QUANNO NASCETTE NINNO

Quanno nascette Ninno a Betlemme,
era notte e pareva miezojuorno...
Maje le stelle, lustre e belle,
se vedèttero accussí...
e 'a cchiù lucente,
jette a chiammà li Magge a ll'Uriénte.

Nun c'erano nemice pe' la terra:
La pecora pasceva co' 'o lione
Co''o capretto, se vedette
'o liupardo pazzeà...
Ll'urzo e 'o vetiello
e, co' lo lupo, 'mpace 'o pecuriello.

Guardavano le ppecore, 'e Pasture...
E ‘n’Angelo, sbrennente cchiù d''o sole,
Cumparette e lle ricette:
- Nun ve spaventate, no! Cuntento e riso!
la terra è addeventata Paraviso!

A vuje è nato ogge, a Bettalemme,
d''o munno, ll'aspettato Sarvatore...
Dint''e panne 'o trovarrite,
nun putite maje sgarrá, arravugliato...
e dint'a lu Presebbio curecato...

Po' assieme se mettettero a sunare
e a cantá cu' ll'Angiule e MMaria
cu' ‘na voce, accussí doce,
ca Gesù facette: Aaaah - há...
e po' chiurette
chill'uocchie aggraziate e s'addurmette.

scarica la versione stampabile [clicca con tasto destro e scegli "salva oggetto con nome"]

[torna all'indice dei canti]